．睇完講幾句。

．入場人數比預期多，分分鐘仲多過舞台劇，OK喎！不過D Tee都好難賣得去啦應該……

．依然係一大絕技：佢地點甩點漏點搞作都好，總有辦法你會睇得好開心！連「甩」都可以拎黎玩一餐，痴線咩！而且比預期中少說話好多，「演唱會」冇吹水，當然我相信大部份觀眾都應該唔介意佢地淨吹水！

．好多未聽過既歌，真係唔知咩名，只特別對大佬果首《對她說》特別有印象，我夠膽講呢首歌真係超水準，係隻國語情歌，全隻歌一個鍵盤+人聲搞掂，由歌到詞到編到唱，有少少陶吉吉上身，而且仲尤有過之，副歌一段又有返「JN多重奏」風格，有cd版或派台，應可成為09年最好歌之一，可惜連新碟都未有，只係演唱會先聽到（即係迫人拎dv入去偷拍擺上youtube！）！大佬真係好勁呀！

．細佬都有隻未有名既情歌，係送俾差少少甩拖之女朋友，聽聞唔公開賣飛既首場（4月9日）細佬女友響現場聽到喊曬！講一個好普通類似曹格《Superwoman》既故事，但氣氛SWEET到暈，連帶唱新歌《Cheese Cake》時又係甜甜甜（歌詞其實係苦既！）。（呢首youtube有片！）

．阿卵唱《李英愛》次次都會搞到ｄ觀眾好high，今次又係！白只果隻《我們五個小孩》又係唔講得笑，上次舞台劇聽現場即喊，今次又唔例外。（一講到父母家人我就好易黎料…）

．唔知講來有冇用啦，場SHOW係好睇，星期日尾場，唔知仲有冇飛賣啦，尾場我都會睇多次。睇唔到現場，可以支持下新碟，HK55個大洋，HMV都有售，下次先寫隻碟。冇記錯上隻《Stage Dive》都成一年半前有多，係英皇發行，今次佢地自資出版，官方解釋係因為佢地自己唔夠自知先搞到要自資……

．同朋友傾開，一開始，大家都覺得朱凌凌係搞笑組合，其實真係錯曬。笑，當然好笑，但其他方面，聽過睇過佢地現場performance，你就知點解冒住俾人笑既危險，都想撐朱凌凌。

．That’s JN.